小玉雜記

小玉雜記

今日終於來到小一放榜的大日子，事前我都幾擔心昕昕派去天水圍，因為昕昕居住的校網借咗大約200個天水圍學位。前幾日我半用心地整咗六頁的Portfolio ，始終昕昕選校填表係睇運氣，如果第一志願入唔到就預咗派去天水圍~~~

其實我本身有諗過俾幫昕昕報爸爸間母校，打算20分有機會入，後來身邊有朋友表示昕昕爸爸母校係校網內top 1，加上有好多校友，所以我決定選近屋企那間小學，因為返學路程只需兩分鐘，雖然係傳統多功課的學校，但節省一至兩小時的交通時間就已經做多兩樣功課ヾ(￣▽￣)Bye~Bye~

昕昕自行15分預咗入唔到，之後才知道昕昕有同學的爸爸跟昕昕爸爸係同一間小學畢業，有20分自行收生失敗要大抽獎，那時我心想好在冇搏昕昕爸爸母校~~~

原本昕昕填大抽獎係星期六，但由於我唔小心夾到佢隻手指，所以推遲在星期日填，當日剛好係昕昕農曆生日，後來我心想生日填表係咪去好運d呢？

由於昕昕間學校的校長在選校分享時講明不會幫派到首三志願的學生寫推薦信，所以我和昕昕爸爸決定第一志願填返自行果間，第二、三志願填都係屋企附近熱門，就算派得唔好都仲有多一個叩門的籌碼。

在放榜前一晚昕昕食佢喜歡的乳鴿，就算放榜唔如意都有個安慰獎俾自己~~~

今日放榜，感恩係昕昕靠運氣入到第一志願，而報昕昕爸爸母校的同學們都被派去天水圍的小學，估全班約18%，有7%同學因為入了直資學校放榜日去了旅行，反觀同區另一校網的同學入到第一志願都有些人，有21%同學係入哥哥姐姐的學校。

不過最戲劇性係有同學自行和甲一選同一間學校入唔到，反而乙一入咗昕昕爸爸的母校，起初我最擔心果位同學，因為對方自行係跨區，而且學校的級數較昕昕爸爸母校次一級，對方能夠幸運地入到好的學校，我都替對方開心。所以話大抽獎真的係睇運氣~~~

至於一班要叩門的媽媽拎咗註冊証後就返幼稚園跟校長面談有關推薦信的事宜，希望昕昕果班要叩門的媽媽可以入返元朗市的學校，小朋友不用長途跋涉咁返學。

有時候我最唔明點解政府在元朗市建設學校的數目不足要外借天水圍而唔係諗元朗市搵地方起新學校去應付人口增長問題。搞到一大班父母要為孩子叩門，果種滋味真的唔好受。

其實30年前的我剛好在元朗居住，初搬入去，父母果代讀書唔多，我被派到步行約45分鐘至1小時的學校，感恩有個四圍幫我叩門的老媽，最後我入咗間到依家已經停學19年的小學，雖然母校校譽一般，感恩都有一班用心讀書的同學，其中一位小學同學在會考時有5A成績，所以話小學讀邊間學校唔係最重要，反而係佢讀中學發力先至最重要~~~

以下是我們的FACEBOOK專頁連結，裡面會有一些昕昕的生活照片和不同資訊分享^^